ಪಾರಿಜಾತ

ಉರುಳುರುಳುತ್ತಿರೋ ಮರುಳಿರುಳಲ್ಲಿ

ಕರುಳರಳುತ್ತಿದೆ ಕಾಣಲ್ಲಿ

ನರುಳರಳುತ್ತಿರೋ ಮನಸುಗಳಲ್ಲಿ

ತಿರುಳರಳುತ್ತಿದೆ ತಿಳಿಯಲ್ಲಿ



ಮಳೆ ತೊಳೆದು ಕೊಳೆ ಕಳೆದು

ನಿಂತಿರುವ ದೇಹವಿದು

ಹರ ಹರಿದು, ಕಳೆ ಕರೆದು

ಬರುತಿರುವ ಮನಸು



ನರ ನರರ ನರ ನಾಡಿ-

-ಗಳ ಒಳಗೆ ಹೊಕ್ಕಿರುವ

ನರಳಾಡೋ ಇರುಳಲ್ಲೇ ಅರಳುತಿಹುದು

ಮರುಳಾಳದಲ್ಲಿಯೇ ಅರಳುತಿಹುದು



ಕರಿ ಕರಿಯ ಇರುಳಲ್ಲಿ

ಪರಿ ಪರಿಯ ಪಾರಿಜಾತ

ಅಂಜದೆ ಅಳುಕದೆ ಅರಳುತಿಹುದು

ತನ್ನ ಕಂಪಿಂದ ಕಂಪಿಸಿ ಇರುಳನ್ನು, ಮರುಳನ್ನು

ಬೆಳಕಿನಾ ಊರಿಗೆ ಕರೆಯುತಿಹುದು